ການໂຄສະນາສິນຄ້າຂອງຄົນລາວ ແມ່ນນິຍົມໃຊ້ເນື້ອໃນແບບປິດສະໜາ
- KEZ Solutions
- Jul 31, 2020
- 1 min read
Updated: Aug 1, 2020
ການໂຄສະຂາຍສິນຄ້າຂອງຄົນລາວສ່ວນໃຫຍ່ແມ່ນເຫັນຢູ່ໃນກຸ່ມໝູ່ ຫຼື ຄົນຮູ້ຈັກກັນເອງ ແລະຂື້ນກັບຄຳເວົ້າໃນການໂນ້ມນ້າວໃຫ້ຊື້, ຫຼືຜູ້ຂາຍມີອິດທິພົນຕໍ່ກັບຄົນຊື້. ແຕ່ຖ້າຜູ້ຊື້ບໍ່ຕ້ອງການຊື້ສິນຄ້ານັ້ນ ແລະຕ້ອງໄດ້ຊື້ແບບເກງໃຈ ຫຼື ຊື້ເປັນປະຈຳ, ຄົນຂາຍອາດເປັນຄົນທີ່ສ້າງຄວາມລຳຄານໃຈໃຫ້ໝູ່ໄດ້ເຊັ່ນກັນ.
ນອກຈາກການຕະຫຼາດຢູ່ໃນກຸ່ມກັນເອງແລ້ວ ການໂຄສະນາທາງໂລກອອນໄລນ໌ທີ່ພວກເຮົາເຫັນຢູ່ທຸກມື້ນີ້ ສ່ວນໃຫຍ່ແມ່ນໃສ່ເນື້ອໃນການຂາຍແບບປິດສະໜາ ທີ່ເຫັນແລ້ວໜ້າລຳຄານ, ດັ່ງຕົວຢ່າງທີ່ຢູ່ລຸ່ມນີ້:
ລົງຮູບສິນຄ້າແບບລົວໆ ແລ້ວລົງເນື້ອໃນສັ້ນໆ ເຊັ່ນ: ມາເດີ້ ມາເດີ້, ແຊບໆ ກອບໆ. ຄົນຂາຍອາດຈະຮູ້ວ່າສິນຄ້າທີ່ຕົນເອງໂຄສະນານັ້ນແມ່ນຫຍັງ, ແຕ່ຄົນເບິ່ງບາງທີອາດບໍ່ເຂົ້າໃຈ ຫຼື ເບິ່ງບໍ່ເຫັນຄັກວ່າສິນຄ້າມັນແມ່ນອີ່ຫຍັງ? ເປັນກົບ, ເປັນຂຽດ ຫຼື ເປັນອື່ງ? ແລະມີສ່ວນປະສົມຫຍັງແດ່, ຜະລິດແບບໃດ?
ໃສ່ຮູບສິນຄ້າເປັນຕາໜ້າແຊບ: ແຕ່ບໍ່ລະບຸປະລິມານ ຫຼື ລາຄາໃຫ້ຮູ້, ເພາະວ່າບາງຄົນເຂົາເຈົ້າບໍ່ຕ້ອງການເສຍເວລາທີ່ຈະແຊັດຖາມລາຍລະອຽດ ຫຼື ທັກເປັນໝູ່ກັບຄົນທີ່ບໍ່ຮູ້ຈັກ.
ໃສ່ຮູບ ແລະ ລາຄາ, ສົນໃຈຖາມໄດ້: ຄົນຂາຍສ່ວນໃຫຍ່ມັກຖ້າໃຫ້ຄົນໄປຄອມເມັ້ນຖາມ (ຫຼືດ່າ) ຫຼື ສົ່ງຂໍ້ຄວາມ, ສຳລັບຜູ້ຂຽນເອງແມ່ນລຳຄານຂໍ້ນີ້ທີ່ສຸດ ເພາະບໍ່ຮູ້ວ່າຂາຍຢູ່ໃສ ຫຼື ໂທຫາໄດ້ແນວໃດ? ແລະບໍ່ຢາກເສຍເວລາທີ່ຈະແຊັດຖາມລາຍລະອຽດ (ສັ່ງບ່ອນທີ່ຮູ້ແລ້ວດີກວ່າ).
ຜະລິດແລະຫຸ້ມຫໍ່ແບບທັນສະໄໝ ແຕ່ຂາດຂໍ້ມູນຕິດຕໍ່: ຕາມສັງເກດເຫັນສິນຄ້າລາວທີ່ວາງຈຳໜ່າຍຢູ່ຕາມມິນິມາດ ຫຼື ຊຸບເປີມາເກັດ ສ່ວນໃຫຍ່ບໍ່ມີການລະບຸຫຼາຍອົງປະກອບທີ່ສຳຄັນ ແລະເປັນຕົ້ນແມ່ນບໍ່ມີເບີໂທລະສັບ ຫຼື ອີເມລ ເຊິ່ງເຮັດໃຫ້ເປັນອຸປະສັກຕໍ່ຜູ້ທີ່ຕ້ອງການສັ່ງຊື້ເພີ່ມ ຫຼື ຕ້ອງການນຳສົ່ງໄປຕ່າງປະເທດ.
ການໂຄສະນາທີ່ໃຫ້ຂໍ້ມູນທີ່ຊັດເຈນແລະຄົບຖ້ວນທຸກຄັ້ງ ແມ່ນເປັນການເພີ່ມໂອກາດໃນການຂາຍ, ເພາະເວລາທີ່ເຫັນໂຄສະນາສິນຄ້າພ້ອມຂໍ້ມູນທີ່ຊັດເຈນແມ່ນຈະເຮັດໃຫ້ຜູ້ຕ້ອງການສິນຄ້າຕັດສິນໃຈຊື້ສິນຄ້ານັ້ນໄວຂື້ນ ເຖິງແມ່ນວ່າລາຄາຈະແພງກວ່າກໍ່ຕາມ. ນອກຈາກນີ້ແລ້ວ; ມັນຍັງບົ່ງບອກໃຫ້ເຫັນວ່າ ເຈົ້າຂອງສິນຄ້າມີຄວາມຮູ້ແບບມືອາຊີບອີກດ້ວຍ.
ເຂົ້າເບິ່ງສິນຄ້າລາວ: https://lo.kezlaos.com/kez-market
Comments